«والنبي أنا خايفة مش عايزة أموت دلوقتي مش عايزة اسيب ابني».. ياسمين غيث تتعرض لوعكة صحية بعد علمها بوفاة هيثم أحمد زكي

الموجز

كشفت الفنانة ياسمين غيث، عن تعرضها لوعكة صحية عقب معرفتها بخبر وفاة الفنان هيثم أحمد زكي، وذلك عبر حسابها الرسمي على موقع تبادل الصور والفيديوهات الشهير "إنستجرام".

ونشرت الفنانة ياسمين غيث عبر حسابها الشخصي بموقع "إنستجرام" صورة لها وهي داخل المستشفى.

وعلقت ياسمين على الصورة بقولها: "أنا كويسة الحمد لله.. بس الحقيقة أنا النهاردة الصبح كنت حرفياً بموت، صحيت على خبر وفاة هيثم أحمد زكي (اللي أثر فيا ووجعلي قلبي قوي من غير ما أعرفه) زي غالباً مصر كلها.. وأجبرت نفسي على النوم تاني علشان مفكرش، وكانت دي النتيجة".

وتابعت: "صحيت علي وجع في صدري رهيب، وجع ناحية قلبي وفضل يزيد جامد قوي وضربات قلبي تعلي وتنزل في لحظة وقلت خلاص دي غالباً يا جلطة يا heart attack في الطريق، كنت لوحدي في البيت، وركزوا معايا في "لوحدي" دي، لحسن حظي كانت صحبتي جاية تاخدني وننزل، طلعت لي لقتني بموت حرفياً وبقول لها "خديني المستشفى حالاً أنا بيجيلي heart attack".

وواصلت: "روحنا على المستشفى ودخلنا الطوارئ وبدأوا الدكاترة يعملولي رسم قلب على ضغط و سكر وكل الكلام ده، النتيجة "كله طبيعي" وأنا بصرخ من الوجع وذراعي بينمل وبعيط وبفتكر كل اللي حصلي في حياتي وبقول لهم "والنبي أنا خايفة، أنا مش عايزة أموت دلوقتي مش عايزة اسيب ابني"..... يطلع عندي "panic attack" يعني "نوبة خوف".

وأضافت: "إدوني مهدئات لغاية ما نمت والدكتور قال لي إنتي متوترة من حاجة وده اللي عمل فيكي كده، لازم تهدي وتريحي "و طبعاً لأني من وقت تعبي بقيت بترعب وبخاف أكتر من زمان بكتير فالخوف كان الضعف".

وتابعت: "الحمد لله جت بسيطة وربنا ستر عليا.. بس بجد الإحساس كان مميت، بدأت أتخيل الغلبان ده "هيثم" اللي ممكن يكون حصل له حاجة شبه كده بس كان لوحده ملقاش اللي ينقذه ويوديه المستشفى وبدأت أفكر إن تاني ربنا بيحاول يوعظنا كلنا بحد محبوب من كل الناس، الوحدة وحشة قوي يا جماعة، كفاية نحكم على بعض من بعيد لبعيد، كفاية بعد وجفاء، كفاية كلام علي بعض، كفاية تشكيك في بعض، كفاية تناكة وقرف، كفاية كفاية، الدنيا بتخلص في لحظة ويا رب متخلصش بينا واحنا لوحدنا، ربنا يرحمك يا هيثم ويرحمنا جميعاً!".

واختتمت حديثها قائلة: "كفاية نحكم على بعض من بعيد لبعيد، كفاية بعد وجفاء، كفاية كلام على بعض، كفاية تشكيك في بعض، كفاية تناكة وقرف، كفاية كفاية.. الدنيا بتخلص في لحظة و يا رب ماتخلصش بينا وأحنا لوحدنا.. ربنا يرحمك يا هيثم و يرحمنا جميعًا!".

وتوفى الفنان هيثم أحمد زكي فجر اليوم الخميس السابع من نوفمبر في منزله بمنطقة الشيخ زايد.

وتوفي الفنان هيثم أحمد زكي داخل منزله بالشيخ زايد، في الساعات الأولى من صباح اليوم الخميس، عن عمر يناهز 35 عاماً، إثر هبوط حاد في الدورة الدموية.

وتلقت مديرية أمن الجيزة، إخطارا من مباحث قطاع أكتوبر، بورود بلاغ من خطيبة الفنان الراحل بأنها حاولت الاتصال به أكثر من مرة ولم يستجب لاتصالاتها.

وشيعت جنازة هيثم أحمد زكي من مسجد مصطفى محمود وحرص على حضورها عدد كبير من نجوم الفن، ومن المقرر أن يقام عزاء هيثم أحمد زكي مساء السبت التاسع من نوفمبر الجاري في مسجد الشرطة بالشيخ زايد.

وبدأ هيثم أحمد زكي حياته الفنية في عام 2006 باستكمال باقي مشاهد فيلم "حليم" بعد رحيل والده بطل الفيلم أحمد زكي، ثم قام ببطولة فيلم "البلياتشو"، ثم توالت أعماله الفنية انتهاء بمسلسل "علامة استفهام" في رمضان 2019، والذي يعد آخر أعماله.

تعليقات القراء