أحمد السعدني تريند السوشيال ميديا بعد اعترافه بالتقصير في حق طليقته الراحلة.. وتعليقات مؤثرة من الفنانين

 

كتب: ضياء السقا

احتل الفنان أحمد السعدني، تريند مواقع التواصل الاجتماعي، خلال الساعات الماضية، بعد نعيه لطليقته الراحلة "أمل سليمان"، واعترافه بالتقصير في حقها، وندمه الشديد على الخلافات التي حدثت بينهما بسبب عدم تحمله المسئولية.

وكتب السعدني، عبر صفحته الشخصية على "فيس بوك"، رسالة نعي مؤثرة لطليقته، قائلا:" عمري ما اتكلمت عن حياتي الشخصية لكن حسيت أني لازم أعمل كده دلوقتي (وَذَكِّرْ فَإِنَّ الذِّكْرَىٰ تَنفَعُ الْمُؤْمِنِينَ)، أو الكافرين أو تنفع أي حد حس أني عملت حاجة".

وأضاف الفنان: "هحاول مطولش يوم ٩/٩/٢٠٠٣ حب من أول نظرة في الشارع ما بين معهد السينما حيث كانت تدرس بمعهد فنون مسرحية حيث كنت ألهو وأدرس برضه ميضرش، كنت راكب عربية وكانت ماشية على رجلها، كنت هخبطها لكن حصل خير لا محصلش قوي خبطتني، هي في قلبي حب تقطيع شرايين، سنة خطوبة، سنة كتب كتاب، شهر جواز خلفة أول ولد هنا بدأت المشكلة اللي بكتب الكلام ده عشانها".

وأوضح: "أنا زي كتير للأسف شباب anti تحمل مسئولية، بص لنسب الطلاق وأنت تفهم، أنا بيجيلي ارتيكريا لما أحس أني مسئول، وهي برضه حبيبتي زي بنات كتير بتقول طلقني أكتر مبتنطق اسمي، كانت النتيجة في أول سنة بس نحو ٤ طلاق شفهي، كل الشيوخ ساعتها قالوا لنا ده لعب عيال الطلاق ليه شروط زي الجواز، تمام أسكت بقى لا تعالى يا عم طبق الشروط، أدي أول طلقة، قشطة يا باشا عشت حياتك؟ أه... ارتحت؟؟ لا".

وتابع: "وحشتني، وحشني حنيتها وحبها وهبلها، متيجي نرجع يا بت، يالا يا متخلف، هوووووب جبنا تاني ولد، نفس الإحساس نفس الارتيكريا بس المرة دي صموووووود مش هينفع نتطلق تاني، لا تصدق نفعت، الجانب الأناني في شخصيتي غلبني، يا عم كبر مخك وعيش حياتك، المشكلة أني عمري مارتحت كنت عايز حضنها وحنيتها وهبلها بس كنت بأجل الرجوع يمكن أكبر أو أعقل أو أقدر أتحمل المسئولية، بجد حددت لنفسي سن معين أرجعلها فيه قال يعني هبقى نضجت بس ملحقتش".

واستكمل السعدني: "ماتت في لحظة كانت بتكلمني قبلها بساعة ومكنتش عيانة كان عندها ضغط زي أغلب الشعب المصري الحمد لله.. ماتت ومشيت وقررت تسبني للأبد، كنت فاكرها هتستناني ومتأكد من ده، مستحيل تحب حد غيري، مجاش في بالي أنها ممكن تموت دلوقتي صغيرة، وأكتر واحدة في حياتي شفتها بتحب الحياة وعندها طاقة إيجابية".

واختتم: "ماتت وسابتلي الولدين والندم.. أنا متأكد أنك في الجنة، روحتي لمن خلقك يوم عرفة، وأميرة وست البنات والستات، ونضيفة وكريمة، وصنتي ولادي وبيتي.. بحبك يا أمل حياتي اللي اتهد، وبوعدك المرة دي هشيل المسئولية، للأسف اتعلمت الدرس بس بعد ما اتحرمت من حنيتك وحضنك، وولادك كمان اتحرموا من أحن أم، ربنا يقدرني وأربيهم أحسن زي ما كنتي عايزة، بحبك ومش بطلب منك غير إنك تسامحيني.. ربنا يرحمك ويرحمني ويرحم ولادنا يا حبيبة عمري الوحيدة".

تعليقات مؤثرة من الفنانين

من جانبه علق الفنان صلاح عبد الله على رسالة السعدني قائلا: "وبقدر ما أبكيتني وأحزنتني أسعدتني يا سعدني بما كتبته للعامة هنا، وبكل الصدق والشجاعة، فكان يا ولدي كلامك هذا الذي أراه بحق درسًا لكل الشباب، بل لكل الرجال، بل للكل بلا استثناء، وأولهم العبد لله".

أما الفنانة مي كساب، قالت عبر حسابها الشخصي على "تويتر"، "أحمد السعدني النهاردة إدى درس للإنسانية.. درس لكل راجل الدنيا بتغره وبتنسيه دوره في الحياة".

وأضافت: "يا أحمد اعترافك بغلطك شجاعة كبيرة منك ورجولة.. ربنا يخليك لأولادك ويصبركم على فراقها".

فيمل كتبت الفنانة عبير صبري: "ربنا يرحمها ويساعدك تتحمل فراقها ويقويك على تربية أولادكم عوضها وخلي ولادك أحسن ناس في الدنيا وده هيريحها ويسعدها وربنا يدخلها الجنة ويصبركم يا رب".

أما وفاء عامر قالت: "حبيبي ربنا يقدرك على وعد وتربية أولادك ويصبرك وجعتني أوي"، وعلقت حنان مطاوع قائلة: "يااااااقلبي. ربنا يرحمها ويصبرك. ويقدرك.. قلبي معاك".

وعلق هاني رمزي له وكتب: "البقاء لله يا حبيبى وربنا يعزيكم ويصبركم ويقدرك على تربية ولادك، قلبى معاك يا أحمد".

وكتبت نجلاء بدر: "حبيبي كل حاجة قدر ومكتوب شد حيلك وربنا يقدرك وتعدي كل الآلام على خير وجعت قلوبنا كلنا بجد".

كانت طليقة الفنان أحمد السعدني، وأم أولاده، توفيت بعد تعرضها لسكتة قلبية مفاجئة، ودفنت في مقابر العائلة على طريق الواحات بـ٦ أكتوبر.

 

تعليقات القراء