رائد «البانتومايم».. التميمي يحكي تفاصيل لقائه بالفنان «أحمد نبيل» وبكائه لإعتقاده أن الفنان الكبير توفى ووجده حي يرزق

تداول نشطاء موقع التواصل الإجتماعي فيس بوك منشوراً للصحفي محمود التميمى عن الفنان أحمد نبيل، يحكي فيه التميمي كيف صادف الفنان الكبير أحمد نبيل أثناء سيره على كورنيش الأسكندرية ، حيث كتب التميمي:

ماشي على كورنيش الإسكندرية و بشر عرق من الرطوبة بس مبسوط بالبحر و فجأة لمحته من ضهره قاعد على الكورنيش
.. اقتربت في هدوء فدلني عليه الصوت رغم تبدل الملامح .. قاطعت حواره مع سيدة من نفس سنه أحسبها زوجته :
- استاذ احمد نبيل
- ايوا .. انا .. بس انت عرفتني ازاي
- و هل يخفى القمر .. اتربينا على شغلك في التليفزيون و احنا اطفال .. انت و عبد الرحمن ابوزهرة و نجوى ابراهيم و بابا ماجد و صفاء ابو السعود و ابو بكر عزت .. أرقى برامج اطفال قدمتوها و احنا اتعلمنا و كبرنا بس مش عارفين نعمل زي اللي عمله جيلكم
- كتر خيرك اصل انا كبرت و شكلي اتغير
- ممكن اتصور مع حضرتك ؟
- يا خبر .. يا ريت
.. كل مكونات معنى التأثر وجدتها في تلك اللحظة على وجه الفنان القدير و كذلك وجه السيدة مع ابتسامة منها و هي تنظر نحوه في فخر بدا و كأنه قد جاء في وقت مناسب .. مناسب تماماً
.. بالمناسبة .. احنا قاسيين جداً مع اللي حبوها و ادوها و مافكروش في المقابل و الزمن
بالمناسبة كمان .. دموعي نزلت بعد ما سيبته .. سنين طويلة كنت فاكره رحل عن عالمنا و مش موجود .. ينفع الناس الحلوة تموت بالحيا كده ؟!

من هو الفنان أحمد نبيل رائد «البانتومايم» 

أحمد نبيل ممثل مصري، من مواليد عام 1943 بحي كرموز بالإسكندرية، وهو رائد فن البانتوميم في مصر، وكان يحب تقليد الفنانين منذ الصغر مثل شارلى شابلن وأبوت وكيستلو، وقدم عروضًا في المدرسة والجامعة، ثم درس البانتوميم بالاتحاد السوفيتي (سابقا) وإخراج البانتوميم بجمهورية أذربيجان.

اشترك بالتمثيل فى أكثر من 120 عملا فنيا ما بين أفلام ومسلسلات ومسرحيات وفوازير.

وحصل على جوائز في فن البانتوميم من الاتحاد السوفيتي، ومن جامعة جنيف واتحاد الأدباء فى الهند وجامعة سيدني بأستراليا.