بعد انتقادها.. ريهام سعيد ترد بقوة على بيان محمد رشاد
كتب: ضياء السقا
أصدرت الإعلامية ريهام سعيد، مقدمة برنامج "صبايا" على قناة الحياة، بيانا للرد على هجوم المطرب محمد رشاد عليها، على خلفية تناولها أزمة انفصاله عن خطيبته مي حلمي قبل حفل الزفاف بساعات قليلة.
وقالت ريهام سعيد في بيان نشرته على صفحتها الرسمية بالفيس بوك: "رد واجب لفنان صاعد، أنا في حالة صدمة من تصريحاتك، الصحافة بتتكلم لمدة 3 أيام ومقررتش ترد غير عليّ، مع إني الوحيدة اللي متكلمتش على سبب الانفصال لأنه خاص بيك".
وأضافت: "مفيش حاجة اسمها حياة شخصية لشخصية عامة، وهي دي الضريبة وبالرغم من علمنا بالموضوع يوم الأحد، ماذعناش حرف، لحد ما الصحافة كلها اتكلمت، ومي دخلت المستشفى، ولحد ما كلمتها مكالمة وقالت هتتكلم عن الموضوع في برنامجي".
وتابعت الإعلامية: "حضرتك قمت بتأليف سيناريو إن أنا قلت إنك اتخليت عنها، ممكن يكون ده إحساسك، لكن أنا مقولتش حاجة شبه كده حتى، أنا قُلت بتمنى إنكم تتصالحوا ولو محصلش يبقى خير ليكم إنتوا الاتنين".
وواصلت مقدمة برنامج "صبايا": "أنا قُلت إني بتكلم عنها مش عنك، لأن البنت دائما بتتأثر بإلغاء الفرح أكتر من الراجل، أستاذ محمد رشاد الـ 5 دقايق اللي في صبايا، اللي بتمنى فيهم الشفاء لزميلة وبواسيها، مايجوش حاجة جنب الأخبار اللي على المواقع".
وختمت سعيد بيانها قائلة: "متاخدش ريهام سعيد كبش فدا، وركز في مرض خطيبتك وإلغاء زواجك اللي هما أهم بكتير، وللعلم مصادري من أقرب المقربين لمي، وموثقة بصور المحادثات، وأخيرا زي ما قلت في الحلقة اللي إنت ماشفتهاش، بتمنى لكم التوفيق".
رشاد يهاجم ريهام
وكان رشاد قد أصدر بيانا للرد على تناول ريهام قضية انفصاله عن خطيبته، وقال: "أولا.. اسمي وحياتي الخاصة والعامة لا تعنيكي في شئ وما أسمحش إنك تصوريني في صورة إنسان مستهتر بمشاعر إنسانة بيحبها أو بينا شئ محترم ولكن يمكن ما حصلش نصيب لخلافات خاصة بينا قبل أي حد كائن من كان والقرار بخيره أو شره عائد علينا أولا وأخيرا قدر الله وما شاء فعل ، وإن لم يشأ لم يكن وإن شاء قد كان".
وأضاف المطرب: "ثانياًُ ..المصادر الموثوقة اللي قالتلك ان مي جالها جلطة في المخ موصلتش لحضرتك إنها كانت معايا أثناء عرض الحلقة بتاعتك بنحاول نوصل لحل يرضي أطراف الخلاف إللي حدث يوم زفافنا ومكنش ولله الحمد عندها جلطة في المخ بعد الشر عنها وعن أي شخص ، ما أعتقدش هتوصلك لأن مصادرك يا أستاذة يا كبيرة، ضعيفة".
جدير بالذكر أن محمد رشاد ومي حلمي انفصلا قبل حفل زفافهما بساعتين فقط، بعد حدوث مشاكل عائلية بين الطرفين، ودخلت الإعلامية الشابة المستشفى إثر إصابتها بصدمة عصبية.