صديق "شهيد التذكرة" يروي تفاصيل مؤلمة في حياة أسرته: والدته منهارة ابنها مات تحت القطار وبنتها ماتت بالسرطان

 

 

قال السيد مندور، 19 عاما، أحد أقارب "محمد عيد" ضحية "قطار طنطا"  "أنا ابن خاله ساكن بعيد عنهم في كفر الشيخ لكن كنا دايما بنطمن على بعض، آخر مرة كلمته كانت من أسبوعين كنت في العين السخنة، كان بيطمن على أحوالي، زي ما يكون بيودعني الوداع الأخير مكنش عاوز يقفل معايا المكالمة".

وأوضح مندور "للوطن": "كنت بعتبر محمد أخويا الكبير اللي بيساعدني وبيقدملي الدعم، هو والده متوفى من زمان ووالدته هي اللي ربته هو وأخواته وتعبت عليهم وهما دلوقتي بيروحوا واحد وراء التاني، بنتها الكبيرة ماتت من 4 سنين بعد إصابتها بالسرطان، ودلوقتي محمد مات بسبب كمسري لا يعرف شيئا عن الرحمة".

أصيبت والدة محمد عيد بالانهيار لحظة معرفتها بالحادث الأليم، بينما تعيش العائلة حالة من الصدمة: "احنا مش هنسيب حق محمد لأنه مات موتة بشعة ، أنا مش عارف أكلم أمي من ساعة الحادث، كلنا مصدومين"، بحسب السيد.

"زارنا في كفر الشيخ من شهرين، أصحابي اللي شافوه لأول مرة ساعتها بيعيطوا عليه دلوقتي"، يتحدث السيد عن حالة الحزن التي يعيشها منذ معرفته بالحادث.

وبحسب السيد، "إحنا حالتنا صعبة ومش قادرين نتكلم مصدومين بجد، كان أبسط حاجة السواق يعملها لو في قلبه رحمة ينزله المحطة اللي بعدها، إحنا نفسنا الكمسري ينط نفس النطة".

تعليقات القراء