بسمة ياسر : أنا صحفية معارضة و بحب إبن أحد رموز الفساد فى مصر!

أجرى اللقاء / محمد هاشم 

الفنانة الشابة بسمة ياسر بدايتها غير أي بداية لوجه جديد
بدايتها مع النجوم الكبار وفي أقوى أوقات عرض المسلسلات
في رمضان وده أصعب إختبار لأي فنان لسة بيبدأ طريقه
قابلنا بسمة وحبينا نتعرف عليها أكتر ...
درست فى جامعة القاهرة ليسانس اداب فلسفة
و عملت تمهيدى ماجستير و فى طريقى لتحضير الرسالة قريبا ان شاء لله وبعمل  حاليا  دبلومة فى تصميم الازياء  .
بدايتي كانت مسرحية ( أولاد الغضب والحب ) مع المخرج الكبير / ناصر عبد المنعم  إللي وقف جنبي كتير وتأليف الكاتب الجميل / كرم النجار اللي كان وراء ترشيحي  لمسلسل ( بابا نور ) بطولة النجم / حسين فهمي والفنانة شيرين ، والشئ اللي أسعدني جداً إنه كتب الدور مخصوص علشاني كدعم لوجه جديد هو مقتنع بيه ، بعد بابا نور لعبت دور مختلف جداً في مسلسل لحظة ميلاد .
بتابع  مع المشاهدين حالياً أهم دور في حياتي بجد وهو دوري في مسلسل ( زي الورد ) و دى أهم خطوة ليا بجد لأن الدور مساحتة حلوة و الكاست كبير و فى نجوم كتير و إخراج الاستاذ\ سعد هنداوى وبستفيد منه كتير لأنه أصلاً مخرج سينمائي والمسلسل 60 حلقة و انا من الشخصيات الرئيسية ، بلعب دور صحفية معارضة و بحب إبن أحد رموز الفساد فى مصر و كمان بدخل فى التيار اللى بيميل للاخوان و بتحجب بس بعيدا عن أي تنظيم مجرد تأثر بالكتب و الأفكار !!
رشحنى مونتيرة اسماها سولافة غير إن أستاذ سعد كان شافنى في فيلم قصير إسمه شيفون كنت بلعب فيه دور بنت محجبة ، تحضير الشخصية يبدأ من الورق كأنى بتعرف على شخص معرفوش و عندما تكتمل القراءة تكون ملامح الشخصية قد تكونت
 ثم تبدأ التفاصيل تخيل الطريقة فى الكلام و النظرات .. الخ بعد كدة ابتدى تدريب مع نفسى على مشهد مشهد وأعدل. 
نفسى يكون فى مساحة للوجوه الجديدة ، ونفسي ما أعملش ادوار تقليدية و احاول اوجه كل طاقاتى فى مكانها الصح وطموحي إنى أنجح على كل المستويات .
سألناها عن رأيها في الدراما المصرية وهل في تغيير فيها ردت بسمة :
شايفة ان فى تغير فى الدراما لما الكتاب و المخريجين الشباب اشتغلوا زى حاجات زي المواطن اكس و دلوقتى طرف ثالث و حكايات بنات و ما شابه ده تغيير كبير لانهم متابعيت السينما العالمية و بيحاولوا وبيجتهدوا لتقديم الأفضل.
حتى اداء التمثيل اختلف .. بس مش عشان الثورة لأ ده عشان مينفعش نضحك العالم علينا !
وعن أفضل مسلسل السنة دي قالت بسمة :
طبعا مسلسل زى نابليون و المحروسة أجمل مسلسل شفته بجد رائع لأنه كمان ثقافة مرئية بفن و إبداع يحول مسار ذوق المشاهد للأرقى
عموماً لسة قدامنا كتير أوي لأن لسه الأسوأ أكتر .
تمنياتنا بالتوفيق للفنانة الجميلة .. بسمة ياسر 

تعليقات القراء